Սուրբ Պատարագ

Նախ. Յանուն Հօր եւ Որդւոյ եւ Հոգւոյն Սրբոյ. ամէն։ Վասն սրբուհւոյ Աստուածածնին, Տէր, ընկա՛լ զաղաչանս մեր, եւ կեցո՛ զմեզ։

Սրկ. Սուրբ զԱստուածածինն եւ զամենայն Սուրբս բարեխօս արասցուք առ Հայր ի յերկինս. զի կամեցեալ ողորմեսցի, եւ գթացեալ կեցուսցէ զարարածս իւր։ Ամենակալ Տէր Աստուած մեր կեցո եւ ողորմեա։

Նախ. Ընկա՛լ Տէր զաղաչանս մեր բարեխօսութեամբ Սուրբ Աստուածածնին, անարատ ծնողի միածնի Որդւոյ քոյ, եւ աղաչանօք ամենայն Սրբոց քոց, եւ աւուրս շնորհիւ, (կամ եւ որոց այսօր է յիշատակ) լու՛ր մեզ Տէր եւ ողորմեա՛, ներեա՛, քաւեա՛ եւ թո՛ղ զմեղս մեր։ Արժանաւորեա՛ գոհութեամբ փառաւորել զքեզ ընդ Որդւոյ եւ ընդ Սուրբ Հոգւոյդ. այժմ եւ միշտ եւ յաւիտեանս յաւիտենից. ամէն։ Խոստովանիմ առաջի Աստուծոյ, եւ Սրբուհւոյ Աստուածածնին, եւ առաջի ամենայն Սրբոց, եւ առաջի ձեր, հարք եւ եղբարք, զամենայն մեղս զորս գործեալ եմ։ Քանզի մեղայ խորհրդով, բանիւ եւ գործով, եւ ամենայն մեղօք զոր գործեն մարդիկ: Մեղայ, մեղայ։ Աղաչեմ զձեզ՝ խնդրեցէ՛ք վասն իմ յԱստուծոյ զթողութիւն։

Սրկ. Ողորմեսցի՛ քեզ մարդասէրն Աստուած հզօրն, եւ թողութիւն շնորհեսցէ ամենայն յանցանաց քոց, անցելոյն եւ այժմուս, եւ յառաջակայէն փրկեսցէ զքեզ, եւ հաստատեսցէ յամենայն գործս բարիս, եւ հանգուսցէ զքեզ ի հանդերձեալ կեանս։

Նախ. Ամէն: Ազատեսցէ եւ զձեզ մարդասէրն Աստուած եւ թողցէ զամենայն յանցանս ձեր։ Տացէ ժամանակ ապաշխարելոյ եւ գործելոյ զբարիս։ Ուղղեսցէ եւ զառաջիկայ կեանս ձեր, շնորհօք Սուրբ Հոգւոյն, հզօրն եւ ողորմածն. եւ նմա փառք յաւիտեանս. ամէն։

Սրկ. Յիշեսջի՛ր եւ զմեզ առաջի անմահ գառինն Աստուծոյ։

Նախ. Յիշեալ լիջիք առաջի անմահ գառինն Աստուծոյ։ Մտից առաջի սեղանոյ Աստուծոյ, առ Աստուած՝ որ ուրախ առնէ զմանկութիւն իմ։

Սրկ. Դա՛տ արա ինձ, Աստուած, եւ իրաւ արա ինձ ի դատաստանի իմում։

Նախ. Յազգէ որ ոչ է սուրբ, ի մարդոյ մեղաւորէ նենգաւորէ փրկեա՛ զիս։

Սրկ. Դու Աստուած հզօրիչ իմ ես, ընդէ՞ր մոռացար զիս. ընդէ՞ր տրտում գնամ ես ի նեղել թշնամւոյ իմոյ։

Նախ. Առաքեա՛, Տէր, զլոյս քո եւ զճշմարտութիւն քո. զի առաջնորդեսցեն ինձ եւ հանցեն զիս ի լեառն սուրբ եւ ի յարկս քո:

Սրկ. Մտից առաջի սեղանոյ Աստուծոյ, առ Աստուած՝ որ ուրախ առնէ զմանկութիւն իմ։

Նախ. Խոստովան եղէց քեզ օրհնութեամբ, Աստուա՛ծ, Աստուած իմ։

Սրկ. Արդ՝ ընդէ՞ր տրտում ես անձն իմ, կամ ընդէ՞ր խռովես զիս. յուսա՛ առ Աստուած, խոստովանեա նմա, Փրկիչ երեսաց իմոց Աստուած է։

Նախ. Փառք Հօր եւ Որդւոյ եւ Հոգւոյն Սրբոյ։

Սրկ. Այժմ եւ միշտ եւ յաւիտեանս յաւիտենից. ամէն։ Եւ եւս խաղաղութեան զՏէր աղաչեսցուք։ Օրհնեսցուք զԱմենակալն Աստուած՝ զՀայր Տեառն մերոյ Յիսուսի Քրիստոսի, որ արժանի արար զմեզ կալ ի տեղւոջ փառաբանութեան, եւ երգել զերգս հոգեւորս։ Ամենակալ Տէր Աստուած մեր, կեցո եւ ողորմեա։

Նախ. Ի յարկի սրբութեան եւ ի տեղւոջ փառաբանութեան, հրեշտակաց բնակարանիս եւ մարդկան քաւարանիս. առաջի աստուածընկալ եւ պայծառացեալ սուրբ նշանացս եւ սուրբ սեղանոյս, խոնարհեալ երկիւղիւ երկիր պագանեմք. զսուրբ, զհրաշալի եւ զյաղթող Տէրութիւնդ քո օրհնեմք եւ փառաւորեմք։ Եւ քեզ մատուցանեմք զօրհնութիւն եւ զփառս ընդ Հօր եւ ընդ Հոգւոյդ Սրբոյ. այժմ եւ միշտ եւ յաւիտեանս յաւիտենից. ամէն։

ԸՆԾԱՅՈՒՄՆ

Նախ. Օրհնութիւն եւ փառք Հօր եւ Որդւոյ եւ Հոգւոյն Սրբոյ. այժմ եւ միշտ եւ յաւիտեանս յաւիտենից. ամէն։

Սրկ. Եւ եւս խաղաղութեան զՏէր աղաչեսցուք. ընկալ, կեցո եւ ողորմեա։

Նախ. Յիշատակ Տեառն մերոյ Յիսուսի Քրիստոսի։ Յաղագս յիշատակի փրկագործ տնօրէնութեան Տեառն մերոյ եւ Փրկչին Յիսուսի Քրիստոսի:

Ծած. Աստուած, Աստուած մեր, որ զերկնաւոր հացդ, զՏէր մեր Յիսուս Քրիստոս, զկերակուրդ ամենայն աշխարհի առաքեցեր Փրկիչ եւ կեցուցիչ եւ բարերար, օրհնել եւ սրբել զմեզ: Ինքնին դու Տէր օրհնեա՛ եւ այժմ զառաջադրութիւնս զայս։ Ընկա՛լ զսա յերկնային քո սեղանդ։ Յիշեա՛ որպէս բարերար եւ մարդասէր զմատուցողս եւ վասն որոց մատուցանի: Եւ զմեզ անդատապարտ պահեա ի քահանայագործութիւն աստուածային խորհրդոց քոց։ Զի Սուրբ եւ փառաւոր է ամենապատիւ մեծվայելչութիւն փառացդ Հօր եւ Որդ ♱ ւոյ եւ Հոգւոյդ Սրբոյ. այժմ եւ միշտ եւ յաւիտեանս յաւիտենից. ամէն։ Հոգին Սուրբ եկեսցէ ի քեզ, եւ զօրութիւն Բարձրելոյն հովանի լիցի ի վերայ քո:

Նախ. Օրհնեալ թագաւորութիւնն Հօր եւ Որդւոյ ♱ եւ Հոգւոյն Սրբոյ. այժմ եւ միշտ եւ յաւիտեանս յաւիտենից. ամէն:

ԺԱՄԱՄՈՒՏ

Սրկ. Եւ եւս խաղաղութեան զՏէր աղաչեսցուք. ընկա՛լ կեցո՛ եւ ողորմեա՛:

Նախ. Օրհնութիւն եւ փառք Հօր եւ Որդւոյ ♱ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. ամէն։

Խաղաղութիւն ♱ ամենեցուն։

Սրկ. Եւ ընդ հոգւոյդ քում։

Նախ. Աստուծոյ երկրպագեսցուք։

Սրկ. Առաջի քո, Տէր։

Նախ. Տէ՛ր Աստուած մեր, որոյ կարողութիւնդ անքնին է, եւ փառքդ անհասանելի, որոյ ողորմութիւնդ անչափ է, եւ գթութիւնդ անբաւ: Դու ըստ առատ մարդասիրութեան քում, նայեա՛ ի ժողովուրդս քո եւ ի տաճարս յայս Սուրբ։ Եւ արա ընդ մեզ եւ ընդ աղօթակիցս մեր առատապէս զողորմութիւն քո եւ զգթութիւն։ Զի քեզ վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։

Ծած. Որ հասարակաց զայս եւ միաձայն մեզ ամենեցուն ուսուցեր աղօթել, եւ զերկուց եւ զերից միաձայնելոց յանուն քո զխնդրուածս պարգեւել խոստացար: Դու եւ այժմ զծառայից քոց զխնդրուածս՝ առ ի յօգուտն կատարեա, շնորհելով յայսմ յաւիտենիս զգիտութիւն քումդ ճշմարտութեան, եւ ի հանդերձեալն զկեանսն յաւիտենականսն պարգեւելով։ Զի բարերար եւ մարդասէր ես Աստուած. եւ քեզ վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։ Տէ՛ր Աստուած մեր, որ կարգեցեր յերկինս զդասս եւ զինուորութիւնս հրեշտակաց եւ հրեշտակապետաց ի սպասաւորութիւն փառաց քոց: Արա՛ եւ այժմ ընդ մուտս մեր մտանել եւ սրբոց հրեշտակաց, եւ լինել պաշտօնակից մեզ եւ փառաբանակից քում բարերարութեանդ։

ԵՐԵՔՍՐԲԵԱՆ ԵՐԳ

Նախ. Զի քո է կարողութիւն եւ զօրութիւն եւ փառք յաւիտեանս. ամէն։

Սրկ. Պռօսխո՛ւմէ։

Սուրբ Աստուած, սուրբ եւ հզօր, Սուրբ եւ անմահ, (որ խաչեցար վասն մեր)

վասն մեր, ողորմեա՛ մեզ (երիցս)։

Ծած. Աստուած Սուրբ, որ ի սուրբս հանգուցեալ ես, եւ երեքսրբեան ձայնիւ սերովբէք գովեն զքեզ, եւ քերովբէք փառաբանեն, եւ ամենայն երկնային զօրութիւնքն քեզ երկիր պագանեն։ Որ ի չգոյէ ի գոյ ածեր զամենայն արարածս։ Որ արարեր զմարդն ըստ պատկերի քում եւ նմանութեան, եւ ամենայն շնորհիւ քով զնա զարդարեցեր, եւ ուսուցեր խնդրել զիմաստութիւն եւ զզգօնութիւն. եւ ոչ անտես արարեր զմեղուցեալն, այլ եդեր ի վերայ նորա զապաշխարութիւն փրկութեան։ Որ արժանի արարեր զմեզ զնուաստացեալ եւ զանարժան ծառայքս քո ի ժամուս յայսմիկ կալ առաջի փառաց սրբութեան սեղանոյ քոյ, եւ զօրինաւոր երկրպագութիւն եւ զփառաբանութիւն մատուցանել քեզ։ Դու Տէր, ընկա՛լ ի բերանոյ մեղաւորացս զերեքսրբեան օրհնութիւնս, եւ պահեա՛ զմեզ քոյին քաղցրութեամբդ։ Թո՛ղ մեզ զամենայն յանցանս մեր՝ զկամայ եւ զակամայ։ Սրբեա՛ զհոգի, զմիտս եւ զմարմինս մեր. եւ շնորհեա՛ ի սրբութեան պաշտել զքեզ՝ զամենայն աւուրս կենաց մերոց. բարեխօսութեամբ սրբուհւոյ Աստուածածնին եւ ամենայն Սրբոց քոց, որք յաւիտենից քեզ բարեհաճոյացան։ Զի Սուրբ ես, Տէր Աստուած մեր, եւ քեզ վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։

Նախ. Տէ՛ր Աստուած մեր, զբազկատարած զաղաչանս ծառայից քոց վերընկալցիս, եւ ողորմեսցիս ըստ մեծի ողորմութեան քում։ Զգթութիւն քո առաքեա՛ ի վերայ մեր եւ ամենայն ժողովրդեանս, որք ակն ունին առ ի քէն առատ ողորմութեանդ։ Զի ողորմած եւ մարդասէր ես, Աստուած գոլով, եւ քեզ վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։

ԸՆԹԵՐՑՈՒՄ ՍՈՒՐԲ ԳՐՈՑ

Ընթերցցի զգիրսն առաքելական եւ ապա զաւուր պատշաճի զԱլելուիա։

Սրկ. Ալէլուիա։ Օրթի։

Նախ.

Խաղաղութիւն ♱ ամենեցուն։

Սրկ. Եւ ընդ հոգւոյդ քում։ Երկիւղածութեամբ լուարուք։

Նախ. Սրբոյ Աւետարանիս որ ըստ (Մատթէոսի)։

Սրկ. Փա՜ռք քեզ, Տէ՛ր Աստուած մեր։ Պռօսխումէ։ Ասէ Աստուած։

Ընթերցցի զաւետարանն

Սրկ.

Փա՜ռք Քեզ, Տէր, Աստուած մեր։

ՀԱՒԱՏԱՄՔ

Ծած. Տէ՛ր մեր եւ Փրկիչ Յիսուս Քրիստոս, որ մեծդ ես ողորմութեամբ, եւ առատ պարգեւօք բարերարութեան քոյ։ Որ դու քոյին կամաւ ի ժամուս յայսմիկ համբերեցեր չարչարանաց, խաչի, եւ մահու՝ յաղագս մեղաց մերոց. եւ պարգեւեցեր առատապէս զպարգեւս Հոգւոյդ Սրբոյ երանելի առաքելոցն։ Հաղորդս արա՛ եւ զմեզ, Տէր, աղաչեմք զքեզ՝ աստուածային պարգեւացդ, թողութեան մեղաց եւ ընդունելութեան Հոգւոյդ Սրբոյ։

ՀԱՒԱՏԱՑԵԼՈՑ ՊԱՏԱՐԱԳ

Ծած. Ոչ ոք արժանի է յըմբռնելոցս մարմնաւոր ախտիւք եւ ցանկութեամբ մատչել ի սեղան քո, կամ սպասաւորել արքունական փառաց քոց. քանզի պաշտել զքեզ՝ մեծ եւ ահաւոր երկնաւոր զօրութեանցդ իսկ է։ Սակայն վասն անչափ բարերարութեանդ քոյ, անպարագրելի Բանդ Հօր, եղեր մարդ, եւ քահանայապետ մեր երեւեցար։ Եւ իբր Տէր ամենեցուն՝ այսմ սպասաւորութեան եւ անարիւն զենման զքահանայութիւն աւանդեցեր մեզ։ Վասն զի դու ես Տէր Աստուած մեր, որ տիրես երկնաւորաց եւ երկրաւորաց։ Որ ի վերայ քերովբէական աթոռոյ բազմիս, սերովբէից Տէր եւ թագաւոր Իսրայէլի։ Որ միայն սուրբ ես, եւ ի սուրբս հանգուցեալ։ Աղաչեմ զքեզ, միա՛յն բարերար եւ հեշտալուր, նայեա՛ յիս ի մեղուցեալ եւ յանպիտան ծառայս քո, եւ սրբեա՛ զհոգի եւ զմիտս իմ յամենայն պղծութենէ չարին։ Եւ բաւականացո՛ զիս զօրութեամբ Սրբոյ Հոգւոյդ, որ զգեցեալ եմ զքահանայականս շնորհ, կալ առաջի սրբոյ սեղանոյս, եւ քահանայագործել զքո անարատ մարմինդ եւ զպատւական արիւնդ։

Նախ. Քեզ խոնարհեցուցեալ զպարանոցս իմ, մաղթեմ՝ մի՛ դարձուցաներ զերեսս քո յինէն, եւ մի՛ մերժեր զիս ի ծառայից քոց։ Այլ արժանի արա՛ մատուցանել քեզ զընծայս զայս՝ յինէն ի մեղուցեալ եւ յանարժան ծառայէս քումմէ։ Վասն զի դու ես՝ որ մատուցանես եւ մատչիս եւ ընդունիս եւ տաս, Քրիստոս Աստուած

մեր։ Եւ քեզ փառս մատուցանեմք՝ հանդերձ անսկիզբն Հարբդ, եւ

ամենասուրբ եւ բարերար Հոգւովդ. այժմ եւ միշտ եւ յաւիտեանս

յաւիտենից. ամէն։

ԸՆԾԱՅԱԲԵՐՈՒՄՆ

Նախ. Լուացայց սրբութեամբ զձեռս իմ, եւ շուրջ եղէց զսեղանով քով։

Ծած. Տէր Աստուած զօրութեանց եւ արարիչ ամենայն լինելութեանց, որ յանէութենէ զբնաւս ի ցուցակութիւն ածեալ գոյացուցեր։ Որ եւ զմեր զհողեղէ՛ն բնութիւնս պատուեալ մարդասիրապէս՝ այսպիսի ահաւոր եւ անպատում խորհրդոյ կարգեցեր սպասաւորս։ Դու Տէր՝ որում պատարագեմք զպատարագիսս, ընկա՛լ առ ի մէնջ զառաջադրութիւնս զայս։ Եւ աւարտեա՛ զսա ի խորհրդականութիւն մարմնոյ եւ արեան Միածնի քոյ, դեղ թողութեան մեղաց պարգեւեա՛ ճաշակողացս՝ զհացս զայս եւ զբաժակս։

Նախ. Շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի, ընդ որում քեզ Հօր՝ միանգամայն եւ Հոգւոյդ Սրբոյ՝ վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։ Խաղաղութիւն ♱ ամենեցուն։

Սրկ. Եւ ընդ հոգւոյդ քում։

Նախ. Աստուծոյ երկրպագեսցուք։

Սրկ. Առաջի քո Տէր։

Նախ. Ողջոյն տուք միմիանց, ի համբոյր սրբութեան։ Եւ որք ոչ էք կարողք հաղորդիլ աստուածային խորհրդոյս եւ առ դրունս էք, աղօթեցէք։

Սրկ. Քրիստոս ի մէջ մեր յայտնեցաւ, Որ Էնն Աստուած աստ բազմեցաւ։ Խաղաղութեան ձայն հնչեցաւ, Սուրբ ողջունիս հրաման տուաւ։ Եկեղեցիս մի անձն եղեւ,

Համբոյրս յօդ լրման տուաւ։

Թշնամութիւնն հեռացաւ,

Սէրն յընդհանուրս սփռեցաւ։

Արդ, պաշտօնեայք՝ բարձեալ զձայն,

Տո՛ւք զօրհնութիւն ի մի բերան,

Միասնական Աստուածութեանն,

Որում սրովբէքն են սրբաբան:

Նախ. Ահիւ կացցուք, երկիւղիւ կացցուք, բարւոք կացցուք, եւ նայեցարուք զգուշութեամբ։

Սրկ. Առ քեզ, Աստուած։

Նախ. Պատարագ Քրիստոս մատչի անարատ Գառն Աստուծոյ։

Սրկ. Ողորմութիւն եւ խաղաղութիւն եւ պատարագ օրհնութեան։

Նախ. Շնորհք, սէր եւ աստուածային սրբարար զօրութիւնն Հօր եւ Որդ ♱ ւոյ եւ Հոգւոյն Սրբոյ, եղիցի ընդ ձեզ ♱ ընդ ամենեսեան։

Սրկ. Ամէն. եւ ընդ հոգւոյդ քում։

Նախ. Ի վե՛ր ընծայեցուցէք ըզմիտս ձեր աստուածային երկիւղիւ։

Սրկ. Ունիմք առ քեզ, Տէր ամենակալ։

Նախ. Եւ գոհացարուք զՏեառնէ՝ բոլորով սրտիւ։

Սրկ. Արժա՛ն եւ իրաւ։

ՆԱԽԱՄՈՒՏ ԿԱՆՈՆԻ

Ծած. Արժան է ստուգապէս եւ իրաւ ամենայորդոր փութով միշտ երկիր պագանելով՝ փառաւորել զքեզ, Հայր ամենակալ։ Որ քոյին անզննելի եւ արարչակից Բանիւդ՝ զանիծիցն բարձեր զկրճիմն։ Որ ժողովուրդ ինքեան առեալ զԵկեղեցի՝ սեպհականեաց զհաւատացեալս ի քեզ։ Եւ զննելի բնութեամբ ըստ ի Կուսէն տնտեսութեան հաճեցաւ բնակել ի մեզ։ Եւ նորագործ աստուածապէս ճարտարապետեալ՝ զերկիրս երկին արար։

Վասն զի որում ոչն հանդուրժէին առաջի կալ զուարթնոցն

ջոկք՝ զարհուրեալք ի փայլակ նացայտ եւ յանմատոյց լուսոյ

աստուածութեանդ, եղեալ այդպիսիդ մարդ յաղագս մերոյ փրկութեան,

շնորհեաց մեզ ընդ երկնայինսն պարել զհոգեղէն պարս։

Նախ. Եւ ընդ սերովբէսն եւ ընդ քերովբէսն միաձայն սրբասացութեամբ յօրինել նուագս, եւ համարձակապէս գոչելով՝ աղաղակել ընդ նոսին եւ ասել.

Սրկ. Սուրբ, Սուրբ, Սուրբ, Տէր զօրութեանց, լի են երկինք եւ երկիր փառօք քո, օրհնութիւն ի բարձունս։ Օրհնեա՛լ որ եկիր եւ գալոցդ ես անուամբ Տեառն. Ովսաննա՜ ի բարձունս։

ԿԱՆՈՆ

Ծած. Սուրբ, Սուրբ, Սուրբ ես ճշմարտապէս եւ ամենասուրբ. եւ ո՛վ ոք պանծասցի բովանդակել բանիւ զքո ի մեզ զանբաւ բարեգորովութեանդ զեղմունս։ Որ եւ անդէն իսկ ի նախնումն զանկեալն ընդ մեղօք՝ զանազան եղանակօք խնամեալ սփոփեցեր՝ մարգարէիւք, օրինացն տուչութեամբ, քահանայութեամբ եւ ստուերակերպ երնջոցն մատուցմամբ։ Իսկ ի վախճան աւուրցս այսոցիկ զբովանդակ իսկ զպարտեաց մերոց խզեալ զդատակնիք, ետուր մեզ զՈրդիդ քո միածին՝ պարտա պան եւ պարտս, զենումն եւ օծեալ, Գառն եւ երկնաւոր հաց, քահանայապետ եւ պատարագ։ Վասն զի ինքնդ է բաշխող, եւ նոյն ինքնդ բաշխի ի միջի մերում միշտ անծախապէս։ Վասն զի եղեալ հաւաստեաւ եւ առանց ցնորից մարդ, եւ անշփոթ միաւորութեամբ մարմնացեալ յԱստուածածին եւ ի Սուրբ Կուսէն Մարիամայ։ Ճանապարհորդեաց ընդ ամենայն կիրս մարդկային կենցաղոյս առանց մեղաց, եւ յաշխարհակեցոյց եւ յառիթն փրկութեան մերոյ եկեալ կամաւ ի խաչն։

ՍՐԲԱԳՈՐԾՈՒՄ

Նախ. Առեալ զհացն՝ ի սուրբ, յաստուածային, յանարատ եւ յարարչագործ ձեռս իւր. օրհ ♱ նեաց, գոհացաւ, եբեկ, ետ իւրոց՝ ընտրեալ, սուրբ եւ բազմեալ աշակերտացն՝ ասելով.

ԱՌԷՔ ԿԵՐԷՔ.

ԱՅՍ Է ՄԱՐՄԻՆ ԻՄ,

ՈՐ ՎԱՍՆ ՁԵՐ

ԵՒ ԲԱԶՄԱՑ ԲԱՇԽԻ,

Ի ՔԱՒՈՒԹԻՒՆ

ԵՒ Ի ԹՈՂՈՒԹԻՒՆ ՄԵՂԱՑ։

Սրկ. Ամէն։

Նախ. Նոյնպէս եւ զբաժակն առեալ, օրհ ♱ նեաց, գոհացաւ, էարբ, ետ իւրոց՝ ընտրեալ, սուրբ եւ բազմեալ աշակերտացն՝ ասելով.

ԱՐԲԷ՛Ք

Ի ՍՄԱՆԷ ԱՄԵՆԵՔԵԱՆ.

ԱՅՍ Է ԱՐԻՒՆ ԻՄ՝

ՆՈՐՈՅ ՈՒԽՏԻ,

ՈՐ ՅԱՂԱԳՍ ՁԵՐ

ԵՒ ԲԱԶՄԱՑ ՀԵՂԱՆԻ,

Ի ՔԱՒՈՒԹԻՒՆ ԵՒ

Ի ԹՈՂՈՒԹԻՒՆ ՄԵՂԱՑ։

Սրկ. Ամէն։ Հայր երկնաւոր, որ զՈրդիդ քո ետուր ի մահ վասն մեր պարտապան պարտեաց մերոց: Հեղմամբ արեան նորա աղաչեմք զքեզ, ողորմեա քո բանաւոր հօտի:

Ծած. Եւ զսոյն միշտ իւր յիշատակ առնել պատուիրան աւանդեաց մեզ բարերար Որդիդ քո Միածին։ Եւ իջեալ ի ստորին վայրս մահու մարմնովն՝ զոր ի մերմէս ընկալաւ յազգակցութենէ։ Եւ զնիգս դժոխոցն աղարտեալ հզօրեղապէս, զքեզ միայն ծանոյց մեզ ճշմարիտ Աստուած, զԱստուածդ, կենդանեաց եւ մեռելոց։ Եւ արդ՝ մեք, Տէ՛ր, ըստ այսմ հրամանատրութեան՝ յառաջ բերեալ զայս խորհուրդ փրկական մարմնոյ եւ արեան Միածնի քոյ: Յիշեմք զդորա՝ որ վասն մեր զփրկագործ չարչարանսն, զկենդանատու խաչելութիւնն, զերեքօրեայ զթաղումն, զերանելի յարութիւնն,

զաստուածապէս համբարձումն, զնստելն ընդ աջմէ քո, Հա՛յր, զահաւոր

եւ զփառաւորեալ զմիւսանգամ գալուստն խոստովանիմք եւ օրհնեմք։

ՆՈՒԻՐՈՒՄՆ

Նախ. Եւ զքոյս՝ ի քոյոցս՝ քեզ մատուցանեմք, ըստ ամենայնի եւ յաղագս ամենեցուն։

Սրկ. Յամենայնի օրհնեա՜լ ես, Տէր, օրհնեմք զքեզ, գովեմք զքեզ, գոհանամք զքէն, աղաչեմք զքեզ, Տէր Աստուած մեր։

Ծած. Զքեզ արդարեւ, Տէր Աստուած մեր, գովեմք եւ զքէն գոհանամք հանապազ։ Որ զանց արարեր զմերով անարժանութեամբս, այսպիսի ահաւոր եւ անպատում խորհրդոյ կարգեցեր սպասաւորս։ Ոչ յաղագս մերոյ ինչ բարեգործութեանց՝ յորոց յոյժ թափուր եմք եւ միշտ ունայն գտանիմք հանապազ։ Այլ ի քո բազմազեղ ներողութիւնդ ցանկ ապաւինեալ՝ համարձակիմք մերձենալ ի սպասաւորութիւն մարմնոյ եւ արեան Միածնի քոյ Տեառնդ մերոյ եւ Փրկչիդ Յիսուսի Քրիստոսի, որում վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։

Նախ.

Խաղաղութիւն ♱ ամենեցուն։

Սրկ. Եւ ընդ հոգւոյդ քում։

Նախ. Աստուծոյ երկրպագեսցուք։

Սրկ. Առաջի քո, Տէր։ Որդի Աստուծոյ, որ պատարագեալ Հօր ի հաշտութիւն հաց կենաց բաշխիս ի մեզ: Հեղմամբ արեան քո սուրբ աղաչեմք զքեզ, ողորմեա արեամբ քով փրկեալ հօտի:

Ծած. Երկիր պագանեմք եւ աղաչեմք եւ խնդրեմք ի քէն, բարերա՛ր Աստուած, առաքեա ի մեզ եւ յառաջի եդեալ յընծայս յայս՝ զմշտնջենաւորակից քո եւ զէակից Սուրբ Հոգիդ։ Որով զհացս օրհ ♱ նեալ՝ մարմին ճշմարտապէս արասցես Տեառն մերոյ եւ փրկչին Յիսուսի Քրիստոսի։

Եւ զբաժակս օրհ ♱ նեալ՝ արիւն ստուգապէս արասցես Տեառն

մերոյ եւ Փրկչին Յիսուսի Քրիստոսի։

Որով զհացս եւ զգինիս օրհ ♱ նեալ՝ մարմին եւ արիւն

ճշմարտապէս արասցես Տեառն մերոյ եւ Փրկչին Յիսուսի Քրիստոսի՝

փոխարկելով Հոգւովդ քով Սրբով։

Նախ. Որպէս զի եղիցի սա ամենեցուն մեզ մերձեցելոցս՝ յանդարտապարտութիւն, ի քաւութիւն եւ ի թողութիւն մեղաց։

Սրկ. Ամէն։ Հոգի Աստուծոյ, որ զփառակցի քո զխորհուրդ իջեալ ի յերկնից կատարես ի ձեռս մեր: Հեղմամբ արեան սորա, աղաչեմք զքեզ, հանգո զհոգիս մեր ննջեցելոցն:

Ծած. Սովաւ շնորհեա՛ զսէր, զհաստատութիւն եւ զըղձալի զխաղաղութիւն ամենայն աշխարհի, Սրբոյ Եկեղեցւոյ եւ ամենայն ուղղափառ եպիսկոպոսաց, քահանայից, սարկաւագաց, թագաւորաց աշխարհի, իշխանաց, ժողովրդոց, ճանապարհորդելոց, նաւելոց, կապելոց, վտանգելոց, աշխատելոց եւ որք ի պատերազմունս բարբարոսաց։ Սովաւ եւ օդոց շնորհեա՛ զբարեխառնութիւն եւ անդոց զպտղաբերութիւն, եւ ախտացելոց ի պէսպէս ցաւս՝ փութապէս զառողջութիւն։ Սովաւ հանգո՛ զամենեսեան յառաջագոյն ի Քրիստոս զննջեցեալսն՝ զնախահարս, զհայրապետս, զմարգարէս, զառաքեալս, զվկայեալս, զեպիսկոպոսունս, զերիցունս, զսարկաւագունս եւ զբնաւ ուխտ եկեղեցւոյ քում Սրբոյ, եւ զամենեսեան՝ որք յաշխարհական կարգէ՝ զարս եւ զկանայս հաւատով վախճանեալս։

Նախ. Ընդ որս եւ մեզ այ՛ց արասցես, բարերա՛ր Աստուած, աղաչե՜մք։

Սրկ. Յիշեա Տէր եւ ողորմեա։

Նախ. Աստուածածնին՝ Սրբոյ Կուսին Մարիամու եւ Յովսէփայ աստուածահօրն, Յովհաննու Մկրտչին, Ստեփանոսի Նախավկային, եւ Սրբոյ Հօրն մերոյ Գրիգորի Լուսաւորչին եւ ամենայն Սրբոց, եղիցի յիշատակ ի սուրբ պատարագս աղաչե՜մք։

Սրկ. Յիշեա՛ Տէր, եւ ողորմեա՛։

Նախ. Օրհնեալ գովեալ եւ փառաւորեալ, հրաշալի եւ աստուածազարդ (Տէրութեանն) Քրիստոսի: Երկիր պագանեմք:

Սրկ. Փա՜ռք տէրութեան քո, Տէր։

Նախ. (ի տօնի սրբոց) Սուրբ եւ աստուածահաճոյ մարգարէին (ից), կամ Առաքելոյն (լոց), կամ Հայրապետին (տաց), կամ Մարտիրոսին (սաց), Ա. Ա., որոյ (որոց) այսօր զյիշատակն կատարեցաք, եղիցի յիշատակ ի Սուրբ պատարագս, աղաչեմք։

Սրկ. Յիշեա՛ Տէր, եւ ողորմեա՛։

Ծած. Յիշեա՛ Տէր, եւ ողորմեա՛. Եւ օրհնեա զՍուրբ կաթուղիկէ եւ առաքելական Եկեղեցի քո, զոր փրկեցեր պատուական արեամբ Միածնի քոյ, եւ ազատեցեր խաչիւն Սրբով, շնորհեա՛ սմա զանշարժ զխաղաղութիւն։ Յիշեա՛ Տէր, եւ ողորմեա՛, եւ օրհնեա՛ զամենայն ուղղափառ եպիսկոպոսունս, որք ուղիղ վարդապետութեամբ համառօտեն ի մեզ զբանն ճշմարտութեան։

Նախ. Եւս առաւել զՍրբազան Պապն մեր զՏէր Ֆրանչիսկոս Քահանայապետ, եւ զԳերերջանիկ Պատրիարքն մեր զՏէր Գրիգոր Պետրոս Կաթողիկոս, շնորհեսցես մեզ ընդ երկայն աւուրս ուղիղ վարդապետութեամբ։

Սրկ. Շնորհեա Տէր։

Ծած. Յիշեա՛, Տէր, եւ ողորմեա՛, եւ օրհնեա՛ զքո առաջի կացեալ ժողովուրդս, եւ զպատարագիս մատուցողս, եւ պարգեւեա սոցա զպիտոյսն եւ զօգտակարսն։ Յիշեա՛, Տէր, եւ ողորմեա՛, եւ օրհնեա՛ զուխտաւորս եւ զպտղաբերիչս Եկեղեցւոյ քոյ Սրբոյ, եւ որք յիշեն զաղքատս ողորմածութեամբ. եւ հատո՛ նոցա զպարտս նոցա ըստ ընդաբոյս առատութեան քո՝ հարիւրապատիկ աստ եւ ի հանդերձելումդ։ Յիշեա՛, Տէր, եւ ողորմեա՛, եւ գթա՛ ի հոգիս հանգուցելոցն,

հանգո՛ զնոսին, եւ լուսաւորեա՛ եւ դասաւորեա՛ ընդ սուրբս քո

յարքայութեանդ երկնից, եւ արժանի արա ողորմութեան քում։

Յիշեա՛, Տէր, եւ զհոգի ծառայի (կամ աղախնոյ) քոյ Ա. Ա.

(յիշատակեսցէ զանուն այնր՝ որոյ վասն մատուցանի զպատարագն) եւ

ողորմեա՛ նմա ըստ մեծի ողորմութեան քում, եւ հանգո՛ այցելութեամբ

ի լոյս երեսաց քոց։ (Իսկ եթէ կենդանի իցէ, ասասցէ). Փրկեա՛ զնա

յամենայն որոգայթից հոգւոյ եւ մարմնոյ։

Յիշեա՛, Տէր, եւ զայնսոսիկ՝ որք յանձնեցին մեզ յիշատակել

յաղօթս՝ զկենդանիս եւ զհանգուցեալս. կառավարեա՛ զկամս հայցմանց

նոցա եւ զմերս՝ ընդ ուղղորդն եւ որ լին է փրկութեամբ։ Եւ

վարձատրեա՛ բոլորեցունց զանանց եւ զերանելի բարութիւնսդ։

Եւ զտեալ զխորհուրդս մեր՝ տաճարացո՛ յընդունակութիւն

մարմնոյ եւ արեան Միածնի քոյ Տեառն մերոյ եւ փրկչին Յիսուսի

Քրիստոսի։ Ընդ որում քեզ Հօր ամենակալի, հանդերձ կենդանարար

եւ ազատիչ Սուրբ Հոգւովդ՝ վայելէ փառք, իշխանութիւն եւ պատիւ.

այժմ եւ միշտ եւ յաւիտեանս յաւիտենից. ամէն։

Նախ. Եւ եղիցի ողորմութիւն մեծիս Աստուծոյ եւ փրկիչիս ♱ մերոյ Յիսուսի Քրիստոսի ընդ ձեզ ընդ ամենեսեան։

Սրկ. Ամէն. եւ ընդ հոգւոյդ քում։

Ծած. Աստուա՛ծ ճշմարտութեան եւ Հա՛յր ողորմութեան, գոհանամք զքէն, որ ի վեր քան զերանելի նահապետացն՝ զմեր պարտաւորելոցս առաւել մեծարեցեր զբնութիւն։ Վասնզի նոցա Աստուած կոչեցար, իսկ մեզ հայր հաճեցար անուանել գթալով։ Եւ այժմ, Տէր, աղաչեմք զքեզ՝ զայսպիսի առ ի քէն զնորոգ եւ զպատուական անուանադրութեանս շնորհ՝ օր ըստ օրէ պայծառացուցեալ ծաղկեցո ի մէջ Եկեղեցւոյ քում սրբոյ։

ՏԷՐՈՒՆԱԿԱՆ ԱՂՕԹՔ

Նախ. Եւ տո՛ւր մեզ համարձակաձայն բարբառով բանալ զբերանս մեր, կարդալ զքեզ, երկնաւորդ Հայր, երգել եւ ասել։

Սրկ. Հայր մեր՝ որ յերկինս ես, Սուրբ եղիցի անուն քո, եկեսցէ

արքայութիւն քո, եղիցին կամք քո, որպէս յերկինս եւ յերկրի։ Զհաց

մեր հանապազորդ տո՛ւր մեզ այսօր. եւ թող մեզ զպարտիս մեր,

որպէս եւ մեք թողումք մերոց պարտապանաց եւ մի տանիր զմեզ ի

փորձութիւն, այլ փրկեա զմեզ ի չարէ։

Նախ. Զի քո է արքայութիւն եւ զօրութիւն եւ փառք յաւիտեանս. ամէն։ Խաղաղութիւն ♱ ամենեցուն։

Սրկ. Եւ ընդ հոգւոյդ քում։

Նախ. Աստուծոյ երկրպագեսցուք։

Սրկ.

Առաջի քո, Տէր։

ՎԵՐԱՑՈՒՄ

Ծած. Որ աղբիւրդ ես կենաց, եւ բխումն ողորմութեան, Հոգի՛դ Սուրբ, ողորմեա՛ ժողովրդեանս, որք խոնարհեալ երկիր պագանեն Աստուածութեանդ քո։ Պահեա՛ զսոսա ամբողջս։ Տպաւորեա՛ յոգւոջ սոցա զձեւ մարմնոյ ցուցակի՝ առ ի ժառանգութիւն եւ ի վիճակ հանդերձելոցդ բարեաց։

Նախ. Քրիստոսիւ Յիսուսիւ Տերամբ մերով, ընդ որում քեզ Հոգւոյդ Սրբոյ եւ Հօր ամենակալի, վայելէ փառք, իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն։

Սրկ. Պռօսխումէ։

Նախ. Ի սրբութի՜ւն սրբոց։

Սրկ. Միայն Սուրբ, միայն Տէր, Յիսուս Քրիստոս, ի փառս Աստուծոյ Հօր. ամէն։

Նախ. Օրհնեա՜լ, Հայր Սուրբ Աստուած ճշմարիտ։

Սրկ. Ամէն։

Նախ. Օրհնեա՜լ, Որդիդ Սուրբ, Աստուած ճշմարիտ։

Սրկ. Ամէն։

Նախ. Օրհնեա՜լ, Հոգիդ Սուրբ, Աստուած ճշմարիտ։

Սրկ. Ամէն։

Նախ. Օրհնութի՜ւն եւ փառք՝ Հօր եւ Որդւոյ եւ Հոգւոյն Սրբոյ. այժմ եւ միշտ եւ յաւիտեանս յաւիտենից. ամէն։

Սրկ. Ամէ՜ն. Հայր Սուրբ, Որդիդ Սուրբ, Հոգիդ Սուրբ։ Օրհնութիւն եւ փառք Հօր եւ Որդւոյ եւ Հոգւոյն Սրբոյ. այժմ եւ միշտ եւ յաւիտեանս յաւիտենից. ամէն։

Ծած. Նայեա՛ց, Տէ՛ր մեր Յիսուս Քրիստոս, յերկնից ի սրբութենէ քումմէ, եւ յաթոռոյ փառաց թագաւորութեան քոյ։ Ե՛կ ի սրբել եւ ի կեցուցանել զմեզ, որ ընդ Հօր նստիս եւ աստ պատարագիս։ Արժանի արա՛ տալ մեզ յանարատ մարմնոյ քումմէ եւ ի պատուական յարենէ, եւ ի ձեռս մեր՝ ամենայն ժողովրդեանս։ Տէ՛ր Աստուած մեր, որ կոչեցեր զմեզ յանուն Միածնի Որդւոյ քոյ քրիստոնեայս, եւ շնորհեցեր մեզ մկրտութիւն հոգեւոր աւազանաւն ի թողութիւն մեղաց, եւ արժանի արարեր զմեզ հաղորդել Սուրբ մարմնոյ եւ արեան Միածնի քոյ։ Եւ այժմ աղաչեմք զքեզ, Տէ՛ր, արա՛ զմեզ արժանի ընդունել զՍուրբ խորհուրդս զայս մեզ ի մեղաց թողութիւն։ Եւ գոհութեամբ փառաւորել զքեզ ընդ Որդւոյ եւ Սուրբ Հոգւոյդ. այժմ եւ միշտ եւ յաւիտեանս յաւիտենից. ամէն։

ՀԱՂՈՐԴՈՒԹԻՒՆ

Նախ. Ի Սուրբ ի Սուրբ պատուական մարմնոյ եւ յարենէ Տեառն մերոյ եւ Փրկչին Յիսուսի Քրիստոսի, ճաշակեսցուք սրբութեամբ, որ իջեալ ի յերկնից՝ բաշխի ի միջի մերում։ Սա է կեանք յոյս, յարութիւն, քաւութիւն եւ թողութիւն մեղաց։ Սաղմո՛ս ասացէք Տեառն Աստուծոյ մերոյ, սաղմո՛ս ասացէք երկնաւոր թագաւորիս մերոյ անմահի, որ նստի ի կառս քերովբէականս։

Սրկ. Օրհնեա՜լ է Աստուած։ Քրիստոս պատարագեալ բաշխի ի միջի

մերում. ալէլուիա: ԶՄարմին իւր տայ մեզ կերակուր եւ սուրբ զԱրիւն

իւր ցօղէ ի մեզ. ալէլուիա: Մատիք առ Տէր եւ առէք զլոյս. ալէլուիա:

Ճաշակեցէք եւ տեսէք, զի քաղցր է Տէր. ալէլուիա: Օրհնեցէք զՏէր

յերկիս. ալէլուիա: Օրհնեցէք զնա ի բարձունս. ալէլուիա: Օրհնեցէք

զնա ամենայն հրեշտակք նորա. ալէլուիա: Օրհնեցէք զնա ամենայն

զօրութիւնք նորա. ալէլուիա:

Ծած. Զո՛ր օրհնութիւն, կամ զո՛ր գոհութիւն ի վերայ հացիս եւ բաժակիս ասասցուք. այլ, Յիսուս, զքեզ միայն օրհնեմք՝ հանդերձ Հարբդ եւ ամենասուրբ Հոգւովդ. այժմ եւ միշտ եւ յաւիտեանս յաւիտենից. ամէն։ Խոստովանիմ եւ հաւատամ՝ զի դու ես Քրիստոս Որդի Աստուծոյ, որ բարձեր զմեղս աշխարհի։

Նախ. Լրումն ♱ Հոգւոյն Սրբոյ։

Սրկ. Գոհութիւն քեզ Քրիստոս։

ՊԱՏՐԱՍՏՈՒԹԻՒՆ ՀԱՂՈՐԴՈՒԹԵԱՆ

Ծած. Հա՛յր Սուրբ, որ անուանեցեր զմեզ անուանակցութեամբ Միածնի քոյ, եւ լուսաւորեցեր մկրտութեամբ հոգեւոր աւազանին։ Արժանի արա ընդունել զսուրբ խորհուրդս զայս մեզ ի մեղաց թողութիւն։ Տպաւորեա՛ ի մեզ զշնորհս Հոգւոյդ Սրբոյ՝ որպէս ի սուրբ առաքեալսն, որք ճաշակեցին եւ եղեն մաքրիչք ամենայն աշխարհի։ Եւ արդ՝ Տէ՛ր, Հայր բարերար, զհաղորդութիւնս այս մասնաւորեա՛ ճաշակման երեկոյին աշակերտացն՝ բառնալով զխաւար մեղաց իմոց։ Մի՛ հայիր յանարժանութիւնս իմ. եւ մի՛ արգելուր զշնորհս Հոգւոյդ Սրբոյ։ Այլ ըստ անբաւ մարդասիրութեան քոյ, պարգեւեա՛ զսա քաւիչ մեղաց, լուծիչ յանցանաց։ Որպէս խոստացաւ եւ ասաց Տէր մեր Յիսուս Քրիստոս, թէ՝ որ ուտէ զմարմին իմ, եւ ըմպէ զարիւն իմ, կեցցէ յաւիտեան։ Արդ արա՛ զսա մեզ ի քաւութիւն, զի որք կերիցեն եւ արբցեն ի սմանէ՝ հանցեն զօրհնութիւն եւ զփառս Հօր եւ Որդւոյ եւ Հոգւոյդ Սրբոյ. այժմ եւ միշտ եւ յաւիտեանս յաւիտենից. ամէն։

Գոհանամ զքէն, Քրիստոս թագաւոր, որ արժանի արարեր

զանարժանս հաղորդիլ սուրբ Մարմնոյ եւ Արեան քոյ։

Եւ այժմ աղաչեմ զքեզ, մի լիցի սա ինձ ի դատապարտութիւն,

այլ ի քաւութիւն եւ ի թողութիւն մեղաց, յառողջութիւն հոգւոյ եւ

մարմնոյ, եւ ի կատարումն ամենայն գործոց առաքինութեան։ Որպէս

զի սրբեսցէ սա զշունչս իմ եւ զհոգի եւ զմարմին իմ։ Եւ արասցէ զիս

տաճար եւ բընակարան ամենասուրբ Երրորդութեանդ։

Զի ընդ սուրբս քո արժանի եղէց փառաւորել զքեզ ընդ Հօր եւ

ընդ Սուրբ Հոգւոյդ, այժմ եւ միշտ եւ յաւիտեանս յաւիտենից. ամէն։

Յովհաննու Ոսկեբերանին ասացեալ աղօթք

Ծած. Գոհանամ եւ մեծացուցանեմ եւ փառաւորեմ զքեզ Տէր Աստուած իմ, զի զիս զանարժանս արժանացուցեր յաւուր յայսմիկ հաղորդակից լինել աստւածային եւ սոսկալի խորհրդոյ քում, անարատ Մարմնոյդ եւ պատուական Արեանդ։ Վասն այսորիկ զսոսա ի բարեխօսութիւն ունելով՝ աղաչեմ յամենայն աւուրս եւ ի ժամանակս կենաց իմոց ընդ սրբութեան քոյ պահեա զիս. որպէս զի յիշելով զբարեգթութիւնս քո եւ կենդանի եղէց ընդ քեզ։ Որ վասն մեր չարչարեցար եւ մեռար եւ յարեար։ Մի մերձեսցի, Տէր իմ եւ Աստուած, խորտակիչն, կնքելով անձին իմոյ պատուական Արեամբդ քով։ Ամենակարող, մաքրեա զիս սոքօք յամենայն մեռելոտի գործոց իմոց, որ միայնդ ես անմեղ։ Ամրացո զկեանս իմ, Տէր, յամենայն փորձութենէ, եւ զպատերազմողն իմ դարձո յինէն յետս, պատկառեալ եւ ամաչեցեալ՝ որչափ յառնէ ի վերայ իմ։ Ամրացո զգնացս մտաց եւ լեզուի իմոյ, եւ զամենայն ճանապարհս մարմնոյ իմոյ։ Լեր հանապազորդ ընդ իս, ըստ անսուտ խոստմանց քոց, թէ՝ որ ուտէ զՄարմին իմ եւ ըմպէ զԱրիւն իմ, նա յիս բնակեսցի եւ ես ի նմա։ Դու ասացեր մարդասէր, կացո զբանս աստուածային անլուծելի հրամանաց քոց։ Քանզի դու ես Աստուած ողորմութեան, եւ գթութեան, եւ մարդասիրութեան, եւ պարգեւիչ ամենայն բարեաց, եւ քեզ վայելէ փառք, հանդերձ Հարբդ եւ ամենասուրբ Հոգւովդ, այժմ եւ միշտ եւ յաւիտեանս յաւիտենից. ամէն։

ՃԱՇԱԿՈՒՄՆ

Ծած. Հաւատով հաւատամ յամենասուրբ Երրորդութիւնդ, ի Հայր եւ յՈրդի եւ ի Հոգիդ Սուրբ։ Հաւատով ճաշակեմ զսուրբ եւ զկենդանարար եւ զՓրկագործ Մարմինս քո Քրիստոս Աստուած իմ Յիսուս՝ ի թողութիւն մեղաց իմոց։ Հաւատով ըմպեմ զսրբարար եւ զմաքրիչ Արիւնս քո Քրիստոս Աստուած իմ Յիսուս, ի թողութիւն մեղաց իմոց։

Նախ. Մարմին քո անապական լիցի ♱ ինձ ի կեանս։

Սրկ. Ամէն։

Նախ. Եւ Սուրբ Արիւն քո ի քաւութիւն ♱ եւ ի թողութիւն մեղաց։

Սրկ. Ամէն։

ԳՈՀԱԲԱՆՈՒԹԻՒՆ

Դպր. Լցաք ի բարութեանց քոց Տէր. ճաշակելով զմարմին քո եւ զարիւն։ Փառք ի բարձունս կերակրողիդ զմեզ։ Որ եւ հանապազ կերակրես զմեզ, առաքեա ի մեզ զհոգեւոր քո զօրհնութիւն։ Փառք ի բարձունս կերակրողիդ զմեզ։

Սրկ. Եւ եւս խաղաղութեան զՏէր աղաչեսցուք։

Դպր. Տէր ողորմեա։

Սրկ. Եւ եւս հաւատով ընկալեալք յաստուածային, սուրբ, երկնային, անմահ, անարատ եւ անապական խորհրդոյս, զՏեառնէ գոհացարուք։

Դպր. Գոհանամք զքէն Տէր որ կերակրեցեր զմեզ յանմահական սեղանոյ քո։ Բաշխելով զմարմինդ եւ զարիւնդ ի փրկութիւն աշխարհի եւ կեանք անձանց մերոց։

Ծած. Գոհանամք զքէն, Հա՛յր ամենակալ, որ պատրաստեցեր մեզ նաւահանգիստ՝ Սուրբ զԵկեղեցի, տաճար սրբութեան, ուր փառաբանի

Սուրբ Երրորդութիւնդ։ Ալէլուիա։

Գոհանամք զքէն, Քրիստո՛ս թագաւոր, որ պարգեւեցեր մեզ

կենդանութիւն կենարար մարմնով եւ արեամբդ քով Սրբով, շնորհեա՛

զքաւութիւն եւ զմեծ զողորմութիւն։ Ալէլուիա։

Գոհանամք զքէն, Հոգի՛դ ճշմարիտ, որ նորոգեցեր Սուրբ

զԵկեղեցի. անարատ պահեա՛ հաւատով Երրորդութեանդ յայսմ հետէ

մինչեւ յաւիտեան։ Ալէլուիա։

Գոհանամք զքէն, Քրիստո՛ս Աստուած, որ զայսպիսի ճաշակումն

բարութեան շնորհեցեր մեզ ի սրբութիւն կենդանութեան։ Սովիմբ

պահեա՛ զմեզ Սուրբս եւ անարատս՝ բնակեալ զմեօք՝ քո աստուածային

խնամօքդ։

Հովուեա՛ զմեզ յանդաստանի կամաց քոց սրբոց եւ բարեսիրաց։

Որով ամրացեալք յամենայն բանսարկուին ընդդիմութեանց, քումդ

եւեթ արժանի եղիցուք լսել ձայնի։ Եւ քեզ միայնոյ քաջայաղթ եւ

ճշմարիտ Հովուիդ հետեւել, եւ առ ի քէն ընդունել զպատրաստեալ

տեղի յարքայութեանդ երկնից, Աստուա՛ծ մեր եւ Տէ՛ր մեր եւ Փրկիչ

Յիսուս Քրիստոս։ Որ ես օրհնեալ ընդ Հօր եւ ընդ Սուրբ Հոգւոյդ.

այժմ եւ միշտ եւ յաւիտեանս յաւիտենից. ամէն։

Անքնին, անհաս, երրեակ ինքնութեանդ, հաստիչ, ընդունող եւ

անբաժանելի միասնական Սուրբ Երրորդութեանդ, վայելէ փառք,

իշխանութիւն եւ պատիւ. այժմ եւ միշտ եւ յաւիտեանս յաւիտենից.

ամէն։

ԱՂՕԹՔ ԱՐՁԱԿՄԱՆ

Նախ. Որ օրհնես զայնոսիկ, որք օրհնեն զքեզ, Տէ՛ր, եւ սուրբ առնես զյուսացեալս ի քեզ: Կեցո՛ զժողովուրդս քո, եւ օրհնեա՛ զժառանգութիւնս քո։ Զլրումն եկեղեցւոյ քո պահեա՛։ Սրբեա՛ զսոսա, որք ողջունեցին սիրով զվայելչութիւն տան քոյ։ Դու զմեզ փառաւորեա՛ աստուածային զօրութեամբ քով։ Եւ մի՛ թողուր զյուսացեալքս ի քեզ։ Զխաղաղութիւն քո պարգեւեա՛ ամենայն աշխարհի, եկեղեցեաց, քահանայից, թագաւորաց քրիստոնէից, եւ զինուորեալ մանկանց նոցա, եւ ամենայն ժողովրդեանս։

Զի ամենայն տուրք բարիք, եւ ամենայն պարգեւք կատարեալք ի

վերուստ են իջեալ առ ի քէն, որ ես Հայր լուսոյ։ Եւ քեզ վայելէ փառք,

իշխանութիւն եւ պատիւ. այժմ եւ միշտ եւ յաւիտեանս յաւիտենից.

ամէն։

Սրկ. Եղիցի անուն Տեառն օրհնեալ, յայսմհետէ մինչեւ յաւիտեան։ Եղիցի անուն Տեառն օրհնեալ, յայսմհետէ մինչեւ յաւիտեան։ Եւ Եղիցի անուն Տեառն օրհնեալ, յայսմհետէ մինչեւ յաւիտեան։

Նախ. Կատարումն Օրինաց եւ Մարգարէից, դո՛ւ ես Քրիստոս Աստուած Փրկիչ մեր։ Որ լցեր զամենայն հայրակամ տնօրէնութիւնս քո, լցո՛ եւ զմեզ Հոգւովդ քով Սրբով։

Սրկ. Սուրբ Խաչիւս աղաչեսցուք զՏէր, զի սովաւ փրկեսցէ զմեզ ի մեղաց, եւ կեցուսցէ շնորհիւ ողորմութեան իւրոյ. ամենակալ Տէր Աստուած մեր, կեցո եւ ողորմեա։

Նախ. Պահպանեա զմեզ, Քրիստոս Աստուած մեր, ընդ հովանեաւ Սուրբ եւ Պատուական Խաչիւդ քով ի խաղաղութեան: Փրկեա՛ յերեւելի եւ յաներեւոյթ թշնամւոյն։ Արժանաւորեա՛ գոհութեամբ փառաւորել զքեզ ընդ Հօր եւ ընդ Սրբոյ Հոգւոյդ. այժմ եւ միշտ եւ յաւիտեանս յաւիտենից. ամէն։

Սրկ. Օրհնեցից զՏէր յամենայն ժամ, յամենայն ժամ օրհնութիւն նորա ի բերան իմ։

Նախ. Օրհնեա՛լ ♱ եղերուք ի շնորհաց Սուրբ Հոգւոյն, երթա՛յք խաղաղութեամբ, եւ Տէր եղիցի ընդ ձեզ ընդ ամենեսեանդ. ամէն։

ԵՐԳՔ ՀՈԳԵՒՈՐ ՍՈՒՐԲ ՀԱՂՈՐԴՈՒԹԵԱՆ

ՅԻՍՈՒՍ ԽՈՆԱՐՀ ԵՒ ՀԵԶ

Յիսուս, Յիսուս, խոնարհ եւ հեզ

Սիրտըս ըրէ՛ Սուրբ Սըրտիդ պէս

Հնազանդ, խոնարհ, քաղցըր եւ հեզ:

Յիսուս, Յիսուս, խոնարհ եւ հեզ

Սիրտըս ի սպառ դի՛ր Սըրտիդ քով

Սիրտըս այրէ Սըրտիդ հրով:

Յիսուս, Յիսուս, խոնարհ եւ հեզ

Հսկէ սրտիս, շնորհք սրբաբար,

Սիրտս վառէ, սիրովդ անմար։

ԱՆՁՆ ԻՄ ԱՀԱ ԾԱՐԱՎԻ

Անձն իմ ահա ծարաւի

Աղբիւրիդ զովարար,

Ո՛վ Փրկիչ իմ սիրելի

Կը դիմէ խանդավառ:

Կրկներգ

Ո՛վ երջանիկ հրեշտակներ

Տըւէք ինձ ձեր վառ սէր,

Ձեր պաշտաման առարկայ

Աստուածն այն ինձ կու գայ:

Տապանակին մէջ ի սպառ

Կենարար իմ Յիսուս

Կը սպասես դու ինձ համար

Տալով ինձ խըրախոյս:

ՈՎ ՔԱՂՑՐԱԳՈՒԹ ՍԻՐՏ ՅԻՍՈՒՍԻ

Ո՛վ քաղցրագութ Սիրտ Յիսուսի

Զըղջմամբ սըրտի եւ դառնագին

Կը խոնարհի առջեւդ հոգիս

Դարձո՛ւր նայուածքըդ կաթոգին:

Ինչո՞ւ համար քու փըրկարար

Աստուածային օրէնքներուդ

Քաղցրութենէն հոգիս ի սպառ

Զուրկ մնայ այսպէս հեռի եւ ցուրտ:

Բաց ինձ Սուրբ Սիրտդ աստուածային,

Այնտեղ միայն պիտի գտնեմ,

Երջանկութիւնն իմ հոգիին,

Եւ երկնքի փառքը վսեմ։

ՀԱՑՍ ԱՅՍ

Հացս այս՝ Մարմին է Քրիստոսի,

Բաժակս՝ Արիւն նորոյ Ուխտի.

Ծածկեալ Խորհուրդըն մեծ յայտնի,

Աստուած ի սմա մեզ տեսանի:

Սա է Քրիստոս Բանն Աստըւած,

Որ ընդ աջմէ Հօրըն բազմի,

Եւ աստ ի մեզ պատարագի,

Բառնայ ըզմեղըս աշխարհի:

ՍԷՐ ԱՆՈՒՆ ՅԻՍՈՒՍ

Սէր անուն Յիսուս,

Սիրով քով ճըմլեա,

Սիրտ իմ քարեղէն:

Վասըն գըթութեանդ

Վասն ողորմութեանդ,

Վերստին կեցո:

Տենչալւոյդ տեսլեամբ

Տուր ինձ յագենալ,

Տէր Յիսուս Քրիստոս:

Րաբունդ երկնաւոր,

Րոտեա զաշակերտս

Րամից երկնայնոց:

Ցօղ արեան քո, Տէր,

Ցօղեա ի հոգիս,

Ցընծասցէ անձն իմ:

Իիւծեալըս մեղօք,

Իիւծեալ աղաչեմ,

Իիւսել ինձ բարիս:

Փրկիչ բոլորից,

Փութա զիս փրկել

Փորձութեանց մեղաց:

Քաւիչ յանցանաց,

Քաւեա զօրհնաբանս,

Քեզ երգել զփառս:

ԵՂԻՐ ՅԻՍՈՒՍ

Եղիր, Յիսուս, ինձ զով աղբիւր

Թող սրբուին, մեղքերս բիւր

Հոգիս շնորհքովդ վերականքնի,

Ժպտի նորէն երկինքն ինծի։

Եղիր, Յիսուս, ինձ ճոխ սեղան,

Խմցուր արիւնդ արքայական,

Աստուածային մարմինդ տուր,

Հիւծած հոգւոյս դեղ կերակուր։

Եղիր, Յիսուս, ինձ ապաւէն,

Երբոր մեղքերս զիս կը փորձեն,

Գամէ ոտքերս որ չը գայթիմ

Ու չը խաչեմ քեզ Աստուած իմ։

Եղիր, Յիսուս, ինձ օթեւան,

Խաչդ ըրէ սրտիս խորան,

Կողդ աղբիւր ինձ անապակ,

Փուշէ պսակդ գլուխս թագ։

Եղիր, Յիսուս, ինձ օրօրան,

Ջամբէ սիրոյդ կաթը բուրեան,

Սուրբ Սրտիդ մէջ մեծնամ,

Ապրիմ Քեզի որդի հաւատարիմ։

ԶԻՆՉ ՏԱՑ ՏՐԻՏՈՒՐ ՏԵԱՌՆ

Զի՞նչ տաց տրիտուր Տեառն ընդ ամենայնի, զոր եւ ետ ինձ:

Զբաժակ փրկութեան ընկալայց եւ զանուն Տեառն կարդացից:

Զողորմութիւնս քո Տէր յաւիտեան օրհնեցից։

Օրհնեա անձն իմ զՏէր եւ մի մոռանար զամենայն տուրս նորա։

ԵՐԱՆԵԼԻ ՄԱԼՈՅԵԱՆ

Բազմաչարչար Նահատակ պանծալի Տէր Իգնատիոս

Քու Վարդագոյն արիւնովդ ոռոգեցիր անապատ.

Վկայ եղար Խաչեալին արիական քու մահով

Վսեմ պարծանք Հայ ազգին Բարեխօսէ մեզ համար։

Տառապանքէն գըր ի վեր վախճանումէն ալ անդին

Սուրբ արիւնովդ մկրտուած Ողջոյն եղար խաչակից.

Բռնաւորին անօրէն դուն քաջաբար դէմ կեցար

Միջնորդութեամբ ծառայիդ՝ Քրիստոս մեզի ողորմէ։

Խաչի սիրոյն նահատակ, զոհեալ անթիւ քաջերուն

Յիշատակը կը տօնէ եկեղեցին ընդհանուր.

Փառքի պսակ կը շնորհէ Յիսուս Քրիստոս իր ձեռքով.

Հաւատացեալ ժողովուրդ եկէք զիրենք մեծարենք։

Եւ մինչդեռ ուտէին նոքա, ա՛ռ Յիսուս հաց՝ օրհնեա՛ց եւ եբե՛կ,

եւ ետ աշակերտացն՝ եւ ասէ. Առէ՛ք կերա՛յք՝ ա՛յս է մարմին իմ։

Մատթէոս ԻԵ։26