Սուրբ Ժամ

Ա.

Յանուն Հօր եւ Որդւոյ եւ Հոգւոյն Սրբոյ. ամէն:

Ով պաշտելի Փրկիչ իմ Յիսուս, անհուն էր սէրդ մեր

անձերուն հանդէպ եւ այդ պատճառով հաստատեցիր

Ամենասուրբ Հաղորդութեան հրաշափառ խորհուրդը Քու

աստուածային Մարմնոյդ եւ Արեանդ:

Ուզեցիր մնալ մեր մէջ մինչեւ աշխարհիս

կատարածը ու շրջապատուիլ հաւատացեալներէդ իբրեւ

Հովիւ եւ քու բարեկամներէդ իբրեւ սիրոյ Թագաւոր:

Ամենասուրբ Հաղորդութեան մէջ կը շարունակես

Զոհդ, որպէսզի ազատես զմեզ մեղքէն ու խաւարէն ու մեր

վրայ իջեցնես օրհնութեան ու շնորհքի ջրվէժներ:

Հրեշտակներդ անգամ բաւական արժանի չեն քու

առջեւդ երեւելու: Իսկ մենք ինչպէ՞ս համարձակինք

նայելու Քեզի մեր անմաքուր աչքերով:

Գիտակից ենք մեր մեղքերուն. ամօթահար ենք մեր

անարժանութեամբ: Ուստի եկած ենք խոնարհ սրտով՝

բերելու Քեզի մեր զղջումն ու սիրոյ կարօտը:

Քրիստոս Աստուած մեր եւ Յիսուս Փրկիչ սիրելի,

ներում կը խնդրենք զղջալից սրտով մեր բոլոր, բայց

մանաւանդ այն մեղքերուն համար, զորս գործած ենք

Ամենասուրբ Խորհուրդիդ դէմ:

Ներէ՛ մեզի, որովհետեւ եղած ենք անտարբեր Քեզի

հանդէպ: Ներէ՛ մեզի, որովհետեւ եղած ենք անհոգ Քեզ

այցելելու: Ներէ մեզի, որովհետեւ Քեզ ընդունած ենք

այնքան ցանցառ, այնքան ցրտութեամբ եւ աւա՛ղ, այնքան

անարժանութեամբ:

Ով Գառն Աստուծոյ, որ կը բառնաս աշխարհի

մեղքերը, դառնալի արցունքով կ’ողբանք մեղքերը մեր Հայ

Ազգին, Եկեղեցիին եւ համայն մարդկութեան:

Մասնաւորապէս մեղքերը բոլոր անոնց, որոնք

կ'ուրանան Քու ներկայութիւնդ Ամենասուրբ

Հաղորդութեան մէջ:

Մեր անկեղծ ու բուռն փափաքն է պաշտել ու սիրել

Քեզ ամէնուն փոխարէն:

Ընդունէ՛, բազմագութ Փրկիչ, մեր խորին հաւատքը

իբրեւ փոխարէնը անոնց անհաւատութեան:

Ընդունէ՛, բարեգութ Յիսուս, մեր եռանդագին սէրը

իբրեւ փոխարէնը անոնց ցրտութեան եւ

անտարբերութեան. ամէն:

Բ.

Տէր մեր եւ Փրկիչ Յիսուս Քրիստոս, Ամենասուրբ

Հաղորդութեան մէջ ուզեցիր ըլլալ ազդակ միութեան

Աստուծոյ եւ հաւատացեալներուն միջեւ:

Քու սուրբ կամքդ է, որ սերտիւ միացած ըլլանք

Քեզի եւ Քեզմով՝ իրարու իբրեւ եղբայրներդ, իբրեւ

զաւակներ երկնաւոր Հօրդ:

Սուրբ Հաղորդութեան Խորհուրդը հաստատեցիր

արդարեւ իբր կեդրոն եւ գագաթ քրիստոնէական

կեանքին եւ անով կը կերտես ու կը սնուցանես Քու

Եկեղեցիդ:

Փարատէ՛ մեզմէ, Տէր, մոլորութիւններուն ստուերն

անգամ: Անհետացո՛ւր մեր մէջէն բաժանումի

ամենադոյզն սերմերը:

Ըրէ՛ որ ուր բաժանում կայ, միութիւն հաստատենք

եւ խաւարին տեղ ճշմարտութեան լոյսը սփռենք:

Ամենասուրբ Հաղորդութիւնդ ըլլայ սիրոյ եւ

պատճառ հաւատացեալներուն միութեան:

Օրհնութիւն եւ գովութիւն միշտ եւ հանապազ

Ամենասուրբ Հաղորդութեան սիրոյ խորհուրդիդ. ամէն:

Գ.

Ո՛վ աստուածային Սիրտ Յիսուսի, առջեւդ

խոնարհած՝ կ’ուզենք հատուցում ընել Քեզի այն

անարգանքներուն համար, որոնք սիրոյ խորհուրդիդ կը

պատճառեն չար մարդիկ եւ անարժան հաւատացեալներ:

Անհաւատները չեն ճանչնար Քեզ: Մենք կ’ուզենք

ճանչնալ միայն Քեզ՝ Ճանապարհ, Ճշմարտութիւն եւ

Կեանք:

Մոլորեալները չեն պաշտեր Քեզ Ամենասուրբ

Հաղորդութեան մէջ: Բայց ահա՛, Տէ՛ր, մեր պաշտամունքը

սիրոյ եւ գոհութեան:

Վատեր ու գաղջեր կ’ամչնան դաւանելու Քու սուրբ

ներկայութիւնդ այս Ամենասուրբ Խորհուրդին մէջ:

Մենք կը նուիրենք Քեզի մեր անսասան

դաւանութիւնը:

Գիտենք ու կը խոստովանինք, որ մենք ալ մեղաւոր

ենք, որովհետեւ չենք հետեւած քու Սուրբ Սրտիդ

թելադրանքներուն:

Այդ պատճառով բոլորած ենք Քեզ այսօր: Զղջալ

կ’ուզենք նաեւ մեր ընթացքին վրայ: Մեր հաւատքին

պակսեցաւ սէրը: Մեր սէրէն բացակայ եղան բարի

գործերը:

Ներէ՛, Տէր, մեր անհաւատութեան, գաղջութեան ու

մեր ապերախտութեան:

Յիշէ՛, Տէր քաղցրագութ, որ մեզի համար աշխարհ

եկար ու մեր բնութիւնը առիր: Մեզի համար թափեցիր

Սուրբ Արիւնդ:

Մեղաւորներ փնտռելու համար իջար երկինքէն:

Ահա մենք: Ներէ՛ ու փոխէ՛ մեր սրտերը: Քեզ սիրել

կ’ուզենք այնպէս, ինչպէս Դու արժանի ես սիրուելու:

Քեզի կը նուիրենք, յատուկ կերպով, Հօրդ եւ Սուրբ

Հոգւոյդ անհուն սէրը: Ինչպէս նաեւ Քու Մօրդ, «Մայր

Գեղեցիկ Սիրոյն» ու բոլոր սուրբերուն ու հրեշտակներուն

բոցավառ սէրը. ամէն:

Դ.

Մեր ազգին համար

Ով աստուածային Սիրտ Յիսուսի, կ’ուզենք Քեզի

նուիրել մեր ազգը:

Շատ հինէն ճանչցած ու սիրած է Քեզ հայ ազգը,

փառաւորած է Քեզ քրիստոնէավայել կեանքով ու

հոյակերտ տաճարներով ու պաշտպանած է սուրբ կրօնքդ

իր արիւնով:

Անհուն գթութեամբդ այնպէս տնօրինեցիր, որ շատ

մը մեծ ազգերէ առաջ հայ ազգին հեթանոսական խաւարը

փարատեցաւ Աւետարանիդ լոյսով:

Շրջապատուած Քեզի թշնամի ցեղերէ, հայ ազգը

չարչարուած, հալածուած է, որովհետեւ յանձն չէ առած

ուրանալ Քեզ, հեռանալ Քու Եկեղեցիէդ:

Մարտիրոսներուդ մէջ բիւրաւորներ կան նաեւ մեր

ազգէն:

Աւա՛ղ, սակայն որքան փոխուած է մարտիրոսներուն

սերունդը:

Նոր հեթանոսութեան մը խաւարը կը թանձրանայ

մեր մէջ:

Քեզի համար մեռնողներուն սերունդը կ’ուրանայ,

կ’անպատուէ, կը մոռնայ Քեզ:

Բայց Դու՝ Տէր, մի՛ մոռնար մեր նախնեաց հաւատքն

ու սէրը, ու Քու աստուածային Սուրբ Անունիդ եւ անոնց

սիրոյն համար, մի՛ լքեր, մի՛ մերժեր մեզ:

Դու կրնաս վերստին յարուցանել մեր ազգին մէջէն

դիւցազներ հաւատքի, յոյսի ու սիրոյ:

Վերստին թագաւորէ՛ մեր սրտերուն վրայ: Տո՛ւր

մեզի հայրեր ու մայրեր, որոնք փայլին ընտանեկան

հաւատարմութեամբ ու սրբութեամբ կազմեն քրիստոնեայ

օճախներ, որոնց մէջ ծլին քահանայական ու

կրօնաւորական կոչումներ:

Տո՛ւր մեզի պատանիներ, երիտասարդներ,

չափահասներ ու ծերունիներ, որոնց պարծանք ըլլայ

գեղեցկութիւնը առաքինութեան եւ ուժը

բարոյականութեան:

Տո՛ւր մեզի մանուկներ, որոնք ուրախութիւն ու

պսակ ըլլան Եկեղեցւոյդ եւ ազգին:

Ով Տէր Յիսուս մահուանդ նախօրեակին աղօթեցիր

Հօրդ, որպէսզի սրբացնէ առաքեալներդ եւ քահանաներդ

ճշմարտութեան մէջ. նոյն աղօթքը այսօր ալ բարձրացուր

աշխարհիս բոլոր քահանաներուն, մանաւանդ հայ

կղերին համար:

Սրբացո՛ւր, ով բարեխօս Յիսուս, նմանապէս բոլոր

կրօնաւորներն ու կրօնաւորուհիները, որպէսզի

հանդիսանան կենդանարար յիշողութիւնը Քու պաշտելի

անձիդ:

Եւ տո՛ւր ամբողջ Ազգին շնորհք զղջումի ու

վերադարձի: Զայս կը խնդրենք բարեխօսութեամբ՝ քու

Մօրդ՝ Նարեկի Տիրամօր Կուսին. ամէն:

Ե.

Ով քաղցրագութ Սիրտ Յիսուսի, թոյլ տուր այժմ, որ

աղօթենք նաեւ մեզմէ ամէն մէկուն համար: Չենք խնդրեր

հարստութիւն փուճ, վայելք սնոտի, եւ ոչ ալ փառք

անցաւոր:

Կը խնդրենք նախ որ օրհնես մեր անձերը եւ մեր

գործերը, որպէսզի արդար վաստակով ապրինք երկրի

վրայ:

Բայց մեր սրտերը կը ձգտին երկրէ վեր, տեւական,

անանձ գանձի:

Դու ինքդ ես այն աստուածային Գանձը, որուն կը

ձգտինք: Բորբոքէ՛ մեզ այն սիրոյ կրակով, զոր աշխարհ

բերիր սառած սրտերը ջերմացնելու:

Տո՛ւր մեզի խոնարհութիւն: Չմոռնանք երբեք, որ

ոչինչ ենք եւ որ մենք զմեզ ու ամէն բան կը պարտինք

Քեզի:

Զօրացո՛ւր մեզ եսամոլութեան, նախանձի,

չարաշահութեան ու մեր բոլոր յոռի ունակութիւններուն

դէմ, որոնք կրնան բաժնել մեզ Քեզմէ:

Կամքով ձուլուած քու Սուրբ կամքիդ հետ՝ ապրինք

ու մեռնինք Աստուծոյ փառքին համար:

Աքսորական ենք, դէպի մեր երկնաւոր հայրենիքը

ուղղէ՛ մեր աչքերը:

Դու եղի՛ր մեր վարձքը յաւիտենական կեանքի մէջ.

ամէն:

Զ.

Նուիրում

Ով քաղցրագութ Յիսուս, փրկիչ մարդկային ցեղի,

գթալիր ականարկ մը դարձուր մեր վրայ, որ

խոնարհաբար ինկած ենք Քու սեղանիդ ոտքը:

Քուկդ ենք մենք ու կ’ուզենք մնալ Քուկդ, որպէսզի

աւելի սերտիւ միանանք Քեզի, մեզմէ ամէն մէկը

յօժարութեամբ կը նուիրէ ինքզինքը Քու Ամենասուրբ

Սրտիդ:

Շատերը բնաւ ճանչցած չեն Քեզ: Շատերն ալ

ուրացած են Քեզ եւ արհամարհած պատուիրաններդ:

Գթա՛, ողորմէ՛ անոնց ու մեզի բոլորիս, ով քաղցրագութ

Յիսուս: Քաշէ՛ բոլոր մարդիկը դէպի քու աստուածային

Սրտիդ:

Իշխէ՛ ու թագաւորէ՛, Տէր, ոչ միայն հաւատարիմ,

այլ՝ նաեւ անառակ որդիներուս վրայ: Տո՛ւր որ փութով

վերադառնանք հայրենի տունը, ու չկորսուինք

թշուառութեան մէջ սովամահ:

Շնորհէ՛ Տէր Եկեղեցւոյդ անդորրութիւն,

ազատութիւն եւ առատ հունձք Սուրբ Արիւնովդ փրկուած

հոգիներու:

Տո՛ւր, Տէր, բոլոր ազգերուն խաղաղութիւն,

ընկերական արդարութիւն ու սէր, որպէսզի աշխարհի

մէկ ծայրէն մինչեւ միւսը հնչէ սա օրհներգը. «Գովութիւն

եւ գոհութիւն աստուածային Ամենասուրբ Սրտին

Յիսուսի, որուն կը պարտինք մեր փրկութիւնը. ամէն:

ՕՐՀՆՈՒԹԻՒՆ Ս. ՀԱՂՈՐԴՈՒԹԵԱՆ

(Քառասնորդաց)

Աղօթք

ՔՀՆ. Տէր Աստուած բարձրեալ ամենակալ, լոյս

անքնին, մեծութիւն ահեղ, գթութիւն անսահմանելի,

մարդասիրութիւնդ օրհնաբանելի, Յիսուս Աստուծոյ

կենդանւոյ Միածին Որդի: Որ սքանչելարուեստ հրաշիւք,

անպարագիրդ Էակ, վասն մեր եղեր Մարդ ի Կուսէն: Որ

Արեամբդ քո զմեզ ստացար, եւ Մարմնովդ կերակրես: Որ

կարգեալ զայս խորհուրդ անճառելի՝ ուխտ կենաց

անփոխադրելի սահմանեցեր: Որ յանուն զենման՝ միշտ

յիշատակաւ քո չարչարանաց առ Հայր քո բարերար

աղօթել զմեզ համարձակեցեր, եւ զայս տուրս շնորհաց

քան զամենայն գործոց քոց զսքանչելիսն մեծացուցեր:

Լուր մեզ, բազմագութ մարդասէր, տուր զպարարեալ

վշտօք Մարմինդ քո ամենայն սրտի սրբարար կերակուր.

զի զքեզ ունին քաւիչ Քահանայ՝ գնեալ Արեամբ հօտս քո,

հայեաց յամենեսեան զաշխատանս մեր ի քո Օթեւանսդ,

ուր գնացեր, Տէր, եւ խոստացար: Արժանացո՛ զքոյս

փառաւորել զքեզ այդր ընդ Հօր եւ ընդ սուրբ Հոգւոյդ ի

յաւիտեանս:

ԴՊ. Ամէն:

ՔՀՆ. Հովիւ քաջ եւ առաջնորդ բանաւոր հօտի,

աղաչեմ զքեզ, Տէր, նայեա՛ գթութեամբ ի ծառայ քո (Ա.Ա.)

Քահանայապետ՝ զոր կարգեցեր հովիւ Եկեղեցւոյ քում

սրբոյ. Տո՛ւր նմա բանիւք եւ արդեամբք առաջնորդել ի

փրկութիւն իւրոց հնազանդելոցն հաւատացեալ նմա

հօտին. զի ընդ նոսին ժամանեսցէ ի կեանսդ յաւիտենից:

ԴՊ. Ամէն:

Կեցո՛ Տէր

Կեցո՛ Տէր զժողովուրդս քո, եւ օրհնեա

զժառանգութիւնս քո. հովուեա՛ եւ բարձրացո՛ զսոսա

յայսմհետէ մինչեւ յաւիտեան:

)Քառասնորդաց)