Ս. Պատարագ

³Իբրեւ ընտիր զինուոր Քրիստոսի, ա՛ռ չարչարանքի բաժինդ։

⁴Զինուորագրուողը չի պարապիր աշխարհէ գործերով եթէ կ՚ուզէ հաճելի ըլլալ զօրավարին։

⁵Նմանապէս մարտիկը, պսակը չ՚ընդունիր եթէ չմարտնչի օրէնքի համաձայն։

⁶Չարքաշ աշխատող մշակը, նախ ի՛նք իրաւունք ունի վայելելու հունձքի պտուղը։

⁷Հասկցիր թէ ինչ կ՚ուզեմ ըսել. Տէրը թող տայ քեզի իմաստութիւն ամէն բանի մէջ։

⁸Յիշէ Յիսուս Քրիստոսը՝ յարուցեալ ի մեռելոց, Դաւիթի ցեղէն՝ իմ Աւետարանիս համաձայն։

⁹Անոր համար կը չարչարուիմ եւ մինչեւ իսկ չարագործի կապանքներ կը կրեմ։ Աստուծոյ խօսքը սակայն չէ շղթայուած։

¹⁰Կը կրեմ ամէն բան, ընտրեալներուն համար, որպէս զի անոնք ալ հասնին փրկութեան, յաւիտենական կեանքով հանդերձ, Յիսուս Քրիստոսի միջոցաւ։

²⁷Պետրոս խօսք առնելով ըսաւ. «Մենք որ ամէն բան թողուցինք եւ քեզի հետեւեցանք, ի՞նչ պիտի ըլլայ մեզի։»

²⁸Յիսուս պատասխանեց. «Ճշմարիտ կ՚ըսեմ ձեզի, վերանորոգման օրը երբ Մարդու Որդին պիտի բազմէ փառքի աթոռին վրայ, դուք որ ինծի հետեւեցաք, պիտի բազմիք տասներկու աթոռներու վրայ՝ դատելու համար Իսրայէլի տասներկու ցեղերը։

²⁹Ով որ իմ անունիս համար թողուցած ըլլայ տուն, եղբայրներ, քոյրեր, հայր, մայր, զաւակներ կամ կալուածներ, հարիւրապատիկ պիտի ստանայ եւ իբրեւ ժառանգութիւն՝ յաւիտենական կեանքը։